تفاصيل مخيفة عن عالم الجن والشياطين

الجن موجود؟

سواء تقبلت وجوده أو لا.
مذكور في القرآن وفيه سورة كاملة بأسم (سورة الجن)، ومذكور في السُنة في مواضع كتيرة.

حبيت أكلمكم على أماكن مرعبة
وأحب انوه، أن العهدة على الراوي سواء القصص دي حقيقية أو أسطورة محلية بيتناقلها أهل البلد.

مغارة”مجلس الجن” في عمان يعتبر من أضخم الكهوف في العالم ممكن نحط جواه الهرم الأكبر عادي، بعيد عن الناس فمكان مثالي للجن، او الناس فاكرة كده مفيش عليه كلام كتير غير أن بيخافوا يروحوا عنده.

مغارة” هاروت وماروت” في العراق، فيه طائفة يهـ.ـودية عايشة هناك إسمها (دعوة الثقليين)، بتمارس السحر الأسود القاتل، واللي بيجي يتعلم من السحرة الجدد؛ بيدخل المغارة ٤٠ يوم في اختبارات من الجن لحد ما يصرفوله جني يساعده.

مغارة “مرشيش” المغرب، او زي ما الناس بتقول (مملكة الجن) نساء ورجال من كل فئات المجتمع، من أعلاه بالعربيات الفارهه، لحد أبسطهم، بيروحوا ياخدوا طلبات الاسياد من محل على ناصية المكان، وياخدوا الدبـ.ـايح ويستنوا الجزار يجي يدبـ.ـحلهم القربان، ويطلبوا حاجة من الجن. ايه الشرك ده اعوذ بالله.

_ “مدينة سيفار” الجزائر، المكان ده من أغرب الأماكن وعليه علامات استفهام كتيرة، ناس قالت إن النقوش اللي لقوها هناك عملها الجن، وناس قالت لا فضائيين.
واتسمت كمان بمثلث برمودا الجزائر، عشان المدينة كبيرة جدًا، مخلصوش اكتشافها من كتر كبرها.

_ “مدينة ديرينكويو” تركيا، مدينة ضخمة، مبنية بالكامل تحت الأرض، تم اكتشافها في 1963، وكل الناس وقتها لغرابة المدينة ووجودها تحت الأرض؛ قالوا أن الجن اللي بناها، وبقت مقصد ومزار سياحي.

_ “كاف الجنون” ليبيا، كهف في قلب جبل كبير، والغريب أنه بيطلع صوت مخيف، الناس بتقول أنه أصوات الجن، وفيه تفسيرات منطقية، زي أن الفتحات اللي فيه بتخلي مرور الهوا يعمل الصوت ده.
كمان أكيد حاولوا يروحوا هناك كتير، ناس طلعت ومرجعتش، وناس قليلة رجعت، قالوا ان قابلوا حد ووقفوا اتكلموا معاه بعدين اختفى فجأه.
ومواقف كتير زي ناس عربيتهم اتعطلت مثلًا، وابنهم نزل يتمشى قريب منهم وقابل واحد اداله عيش، ورجع لأهله اللي اكدوا أنهم مشافوش أي حد بيقرب من ابنهم أصلًا.

_ مغارة “بيت البنية” مصرـ سوهاج، يقال أن فيها دهب، بس محدش قدر يدخلها من الأساس لأن بيسكنها ٧ بنات من الجن اللي بيمتازوا بالجمال الشديد، وده على لسان ناس كتير كانت بتشوف بنات حلوين أوي لما بيقربوا من طريق المغارة دي.
وموضوع الدهب ده عشان فيه ناس حكت ان اللي بيقدر يدخل من المختارين بياخد هديه دهب، ولما بيحاول يرجع لنفس المكان مش بيلاقي الباب اللي دخل منه أصلًا.
وفيه رسومات اثرية فرعونية ويونانية حوالين المنطقة اللي فيها المغارة وده بيضيف رهية للموقف.
المغارة دي دلوقتي الدولة حطت عليها سور حديد ووقفت حراسة، عشان متبقاش مرتع للسحرة والمشعوذين، والجرايم الغير مبررة اللي بيزقوها كأن الجن اللي عملها.

العالم فيه حاجات كتير مثيرة للأستغراب والتساؤولات، في النهاية إحنا ملناش دعوة بالكلام ده ولا هنجرب نروح الأماكن دي، عشان الفضول في الحاجات دي مؤذي.