"هدفى هو توصيل الرسالة بمحتوى فنى هادف" المُعلق الصوتي أحمد محمد ورؤيته الثاقبة للفن الصوتي بشكل عام

من هو المُعلق الصوتي أحمد محمد؟

احمد محمد يونس من المطرية ، محرر صحفى بمجلة الرجوة الأدبية وفويس اوفر على جريدة قلب الحدث وفويس اوفر لاتحاد شباب العمال

شهرتى ايام الكليه/ احمد الدولى ، حاصل على ليسانس حقوق جامعة القاهرة 2018 ، حاصل على العديد من شهادات التنميه البشريه المتنوعه ،حاصل على شهاده تقدير من راديوH

حاصل على شهاده كورس التمثيل الإذاعى مع الفنان سامح حسين وعمل مسلسل نقطة من أول السطر من إخراجه ومن تأليف الاستاذ محمد ابراهيم عبد العظيم مؤلف قصص الرعب للمذيع أحمد يونس

حاصل على شهاده الدوبلاج والتمثيل الإذاعى مع الفنان كريم الحسينى وعمل معه سهرة إذاعية تحت مسمى دور كمان ، حاصل على شهاده تدريب الحماية المدنيه المقدمه من شرطه السياحه، أتممت الكورس النظرى من كورس الصحافه من منصه الاهرام الاخباريه

حصُلت على منحه الصحافه والإعلام من جريده قلب الحدث وكارنيه معتمد ويُشرف عليه المجل…

انا من زمان حاسس انى صوتى مميز لما كنت بقرأ قرءان وانا بحب التمثيل وكنت برتجل كتير زمان قصص مع اخويا ونمثلها وفيه حاجات صورتها لكن مكنتش بنزلها

متى بدأت التعليق الصوتي ؟ ولماذا أخذت تلك الخطوة؟

انا ابتديت اخد الخطوة لما رحت للفنان سامح حسين الكورس وهو قالى أني صوتى مميز بس حاسب من الثبات على نبرة واحده عشان ممكن يورطك لازم ننوع ونلون ونحس بالاداء عشان المستمع ميملش وعشان هو مش شايفك وانا الشايف أن المجال من أصعب أنواع الفن عموما اصعب حتى من الفن المسرحى لانك وانت متشاف حركات ايدك ووجهك متشافين وتقدر توضح لكن اللى وراء الكاميرا وراء المايك هيوضح ازاى الا عن طريق الصوت وبعد كده ابتديت انزل على صفحتى حاجات كتير ولغاية دلوقتى بنزل وبناقش مواضيع اجتماعية ونفسية

ماهي أهدافك من التعليق الصوتي ؟ وماذا تنتظر في المقابل؟

هدفى هو توصيل الرسالة بمحتوى فنى هادف عن طريق النقد البناء للعادات والأخطاء والتقاليد الخاطئه ومحاولة تصحيحها ووعى الناس بالعادات السليمة

انا اريد أن اكسب المال ويكون هو مصدر رزقى اريد الاستقرار

لماذا إخترت مجال التعليق الصوتي بالذات؟

انت عارف طبعا أن الحياة تجارب وانا جربت الكتابة والتقديم الإذاعى والتلفزيوني وتقديم محتوى أمام الكاميرا لكن المتميزين والمتخصصين والجمهور وطبعا اقتناعي الشخصى متفق على أن المجال ده هو بتاعى وان صوتى مميز ومطلوب ومن اول فويس نزلته لكلية الشرطة وفيه تشجيع ليا عشان كده اشتغلت اكتر واكتر ولسا مستمر

هل ستشاركِ في جوائز أدبية هذا العام ؟

ممكن توضيح اكتر

يعني هل ناوي تشارك ف اي مسابقات من الكبرى الي بتقام ف الشتا

انا عمرى ما شاركت لكن أنا بصراحة معرفش تفاصيل عنها عشان اشارك

هل يمكنك ذِكر ثلاثة مفاهيم أو عناصر تطبقها في كل سكربيت؟

صراحة أنا مش بكتب اسكريبت أنا بضيف الفكرة من دماغى وأشرف عليها وبخلى الذكاء الاصطناعي يعمل الاسكريبت عشان أنا مش مؤلف

هل هناك مُعلقين صوتيين مشهورين يُلهمونك؟ ولماذا يُلهمونك؟

بص مقدرش اقول اساطير لأن بالرغم أن المجال ده اكتر حاجة بمارسها حاليا وان كان بشكل تطوعي ، لكن أنا بحب اسمع أحمد عبد الباسط ، وعصام سيف صوتهم لامع ومعروف

إذا كان بإمكانك تحسين محتواك، ماذا ستغير؟

هو تقوية اللغة العربية الفصحى

والتدريب على الاعلانات الكثيرة

ما هي أسوء مواقف حدثت لك في الوسط الأدبي؟ وماذا تعلمت منها؟

حضرتك تقصد الوسط الاعلامى والفني ؟ أنا الادب لم اتطرق لكتابة شئ بمعنى الادب

انا كنت عملت 5 افكار لقصص ايام عملى مع الفنان كريم الحسينى وقمت بتأليف مرة واحده قصة كاملة 4 صفحات كنت حاطط فيه شخصية راوى وسجلتها ونزلتها عندى فى الصفحة

ما هي الصفات التي تجعل من المُعلق الصوتي مُعلق جيدا؟

الصفات هى

أن أهم حاجة اللغه العربية الفصحى السليمة ، مخارج الحروف تكون واضحة ، النفس بتاعنا ميكونش واضح فى التسجيل نتدرب عليه كويس ، منتسرعش نتكلم بهدوء ، ومن أهم حاجة الاحساس وندى كل كلمة حقها فى التعبير وعلى حسب التلوين ونوع التعليق الصوتى ، لو هتسجل يبقى فى مكان عادى مقفول ومايك كويس مش لازم يكون عالى اوى المهم يكون فى هندسة صوتية كويسه بعد التسجيل

في الأخير ما هو إنطباعك عن المجلة ؟ وما هي ملاحظاتك في ما يخص المحتوى؟

ناس مجتهدة وعاملة شغل كويس جدا وفكرة المسابقة فكرة عظيمة جدا عشان بتزود فرص المنافسة وبتوضح الاصوات الجديدة واكتشاف المواهب ويمكن فيما بعد يبقى من اشهر الاصوات فى العالم اهم حاجة الاستمرارية فى المجال ومنسمعش لحد من المحبطين دول عاوزين يوقفوا الناجح بأى شكل عشان يبقى فاشل زيهم ونسمع اكتر من المتخصصين وأصحاب الخبرات فى المجال ونتعلم ولازم نتعلم لحد ما نموت لأن فى اى مجال لو اى حد حس أنه شبع من اللى بيعمله هيتغر ومش هيضيف جديد وبالتالى هيتنسى ومحدش هيسعمه تانى

مقدرش اقول ملاحظات بناءا على حوار واحد أو تعامل واحد لازم يكون فيه تعامل كتير ومعرفة اكتر بالأشخاص عشان اعرف اقول المميزات والعيوب بشكل واضح وصريح

في النهاية بنشكر حضرتك جدًا علي اللقاء الممتع دا ونتمنى لحضرتك كل التوفيق.