قصيدة :عاش جوه البير
عاش جوه البير
من يوم ما اخواته رموه جواه!
واتهموا ف قتله الديب اياه
وقميصوا اتلطخ بالكدبه مش بس الدم
ازاي هيعيش ويقضي الجاي من دون احباب؟
ولا حضن الام اللي تشده من وسط اليم
تاه وسط الغاب..
ومكنش ف ايده الا اللعبه
وبراءته ماشيه بتنطط..
زي الاطفال في ضلوع الحي
كان نفسه ف لبس جديد للعيد
ولكنه مبصش يوم لصحابه ولهدومهم
وعيونه مكنش يبان منهم غير الضحكه
كان نفسه يدوق طعم اللقمه
من غير م تكون مليانه اهات
كان نفسه يجرب طعم الحضن
من غير م يكسر ضلعه اليتم
او تبكي عيونه من الوحده
ولكنه مدقش غير التوه
كان نفسه ف بيت وحطان تأويه
دوامه ودايره بتجلد فيه
كان طفل وشاب قبل اوانه
عاش عمره يدور علي (لاوي)
يمكن لو هل،
وف ايده قميص الاخ الغايب عن اهله
يرميه علي قلب الخلق تحن
وتطبطب علي قلبه المسكين
طنعه السكين
ومماتش ساعتها من الطعنه
كان ميت يومها من الصدمه
ازاي الضربه تكون من اخوه
نام يومها ف حضن رصيف الشارع عز البرد
ولكنه محسش بالساقعه
كان صاحي ليلتها يعشم نفسه بطعم الحضن الي يدفيه
والدمع مدفاش
زاهد ف كل الامتعه
والجاي لعنده يروح بلاش
شاطر ف تأويل الرؤي
والفرقه من رؤياه نصيب
ف بلاش تشوفوه ف قصته الحكمه
بعين اللي مات وافترسه ديب
رغم انه حى
لكن شوفوه بعين اللي مات من غير حبيب
ومشافش يوم ف الغربه ضي…
About Me
ميادة جمال
مياده جمال (مادونا) ذات الـ٢٦ ربيع حاصلة على ليسانس حقوق جامعه اسكندرية بدات الكتابه ف ٢٠٢٢
شاركت في مسابقه مهرجان روح الشباب حصدت المركز التالت و المركز الثاني في عامين متتاليين
