متلازمة مانشهاوزن

في الواقع أنا بحب الأعمال الفنية المقتبسة من أحداث واقعية

لكن انهاردة هتكلم على أقتباس حقيقي مؤذي نفسيًا، ومش قادرة أتخيل مدى بشاعة الواقع ورا القصة.

شركة hulu بتبهرني في تقديم أفكار قوية وكان لهم عملين
( فيلم Run ) و ( مسلسل The act)
دول تناولوا متلازمة “مانشهاوزن” في أبهى صورها، وكمان قصة المسلسل حصلت بالفعل.

أيه هي متلازمة”مانشهاوزن -الأضطراب المُفتعَل” أصلًا،

بمعنى أفتعال أو أدعاء شخص أنه مريض أو أن حد تبعه مريض سواء أبن،

أبنة أو زوج أيًا كان بس أغلب الحالات كانت في الأبناء لسهولة فرض السيطرة عليهم يعني.

أعراض المرض بتتفاوت بردو من خفيفة لثقيلة، هتستغربوا لما هتلاقوا ناس تعرفوهم مرضى بالمتلازمة دي،

اللي بيدعوا المرض أغلب الوقت دول وهما أصحاء أو بيهولوا مرض خفيف، هما مش وحشين، بس جايز محتاحين إهتمام أو لأي سبب.
الأعراض الثقيلة للمرض بقى، هي أن الشخص يتلاعب بنتائج التحاليل وياخد أدوية مش مناسبة.

والاعراض المشتركة بين المرضى بالمتلازمة دي،

هي معرفة مصطلحات طبية كتيرة
زيارة للمستشفيات كتير بدون داعي، وده بيصعب على الدكاترة التشخيص، لأن أنت قدام شخص بيقولك مصطلحات طبية وبيشتكي من حاجات وبالكشف مش بتلاقي حاجة.

مجادلة كتير مع الدكاترة والموظفين.
-وجود جروح كتير دليل على العمليات اللي ممكن يكون مكنش المريض محتاجها من الأساس.

المرضى دول بشفق عليهم من اللي بيعملوه في نفسهم، ومحتاجين رعاية نفسية مكثفة بالرغم من صعوبة العلاج.
لكن فيه وجه تاني للمتلازمة وهو اللي بيفتعلوا فيه مرض حد تاني أسمه
متلازمة “مانشهاوزن باي بروكسي”

وده ممكن يوصل أن الشخص يأذي حد عشان بس يقول أنه مريض ومحتاج رعاية صحية، وغالبا بيكون طفل لأن محدش كبير وعاقل هيوافق أن حد يأذيه من غير ما يتكلم، وهو الملاك الحارس ويجري ورا الماعونات والأمتيازات والتعاطف من ورا المرض ده.
ولخبرة المريض بالمصطلحات الطبية مع الوقت بيكون خبير في الأعراض والأدوية وتزوير تاريخ مرضي كامل،
بالتالي بيصدق الدكتور والقرايب المرض وبياخد مريض المتلازمة اللي هو عايزة من تعاطف وغيره.

أسبابه أيه بقى المرض ده،

مش معروف تحديدًا لكن المتفق عليه أنه خليط من العوامل النفسية والضغوط اللي ممكن تكون بدأت من الطفولة بأهمال أب وأم مثلًا.

نيجي لمسلسل The act،
المسلسل أتعمل 2019، تناول قصة حقيقة حصلت 2015 في سبرنجفيلد لما صحيوا على جريمة قتل الأم (دي دي بلانشارد) والبنت مختفية.

لو هتشوف المسلسل متقراش اللي جاي*

الأم كانت بتعاني من متلازمة مانشهاوزن،

أفتعلت مرض بنتها منذ الصغر وكانت بتحلق شعرها عشان تبان مريضة سرطان وادتها أدوية توقع أسنانها وأدوية كتير جدًا جسمها مش محتاجها، وتزوير تقارير وروشتات، عشان تاخد بيت ومعاش وتعاطف من الناس والحكومة لبنتها المريضة بالولا حاجة.

بس البنت بتكبر وبتفهم أنها كويسة مش محتاجة كل ده، بتجرب تاكل سكريات وبتعرف أنها معندهاش حساسية من السكر
ودي بتكون البداية وبتعرف كل حاجة بالتدريج اللي هيوصلها أنها تقتلها بمعاونة صديق عرفته عن طريق الفيسبوك.

اللي قولته ده مش مجرد مسلسل ده حادثة حقيقية وتم القبض على البنت والولد وأخدت البنت 10 سنين قتل من الدرجة التانية،

وخرجت بعد 7 سنين رأفة باللي حصل من أمها فيها.
مع أني شايفة أن هي كانت محتاجة مصحة نفسية أكتر من السجن.
الولد أخد 25 سنة غير قابل للنقض لأنه قتل من الدرجة الأولى مع سبق الاصرار.

المرض النفسي أخطر من العضوي بمراحل وللأسف مش بيظهر بسهولة،

وفيه أنواع زي اللي فوق ده مؤذي للأخرين، محتاجين ندعم نفسنا واللي حوالينا بأستمرار معنويًا ونهون على بعض عشان منموتش بعض